உருளைக்கிழங்கு போண்டா செய்வது எப்படி?

உருளைக்கிழங்கு போண்டா மாலை நேரத்தில் காப்பி, டீ போன்றவற்றுடன் உண்பதற்கு ஏற்ற சிற்றுண்டி ஆகும். இதன் சுவை எல்லோரையும் கவர்ந்திழுக்கும்.

எளிதாக‌ சுவையான உருளைக்கிழங்கு போண்டா செய்முறை பற்றிப் பார்ப்போம்.

பச்சரிசி – 200 கிராம்

உளுந்தம் பருப்பு – 100 கிராம்

உருளைக்கிழங்கு – 200 கிராம்

இஞ்சி – சுண்டு விரல் அளவு

கரம்மசாலாப் பொடி – இரண்டு ஸ்பூன்

உப்பு – தேவையான அளவு

மிளகாய் வற்றல் – 2 எண்ணம்

எண்ணெய் – பொரிக்கத் தேவையான அளவு

நல்ல எண்ணெய் – 2ஸ்பூன்

பெரிய வெங்காயம் – ஒன்று (பெரியது)

பச்சை மிளகாய் – 2 எண்ணம்

கறிவேப்பிலை – ஒரு கொத்து

பச்சரிசி, உளுந்தம் பருப்பு, காம்பு நீக்கிய மிளகாய் வற்றல் ஆகியவற்றை தனித்தனியே ஊற வைக்கவும்.

பின் பச்சரிசியுடன், மிளகாய் வற்றலைச் சேர்த்து பரபரப்பாக அரைத்துக் கொள்ளவும்.

உளுந்தம் பருப்பினை தனியாக அரைத்து பச்சரிசி மாவுடன் தேவையான உப்பு சேர்த்து கலந்து கொள்ளவும்.

அரிசிமாவுக் கலவையானது பஜ்ஜி மாவு பதத்தில் இருக்க வேண்டும்.

உருளைக்கிழங்கினை அவித்து தோலுரித்து மசித்துக் கொள்ளவும்.

பெரிய வெங்காயத்தை தோல் நீக்கி சதுரத் துண்டுகளாக வெட்டிக் கொள்ளவும்.

பச்சை மிளகாயை சிறு துண்டுகளாக்கவும். இஞ்சியை தோல் நீக்கி சிறு துண்டுகளாக்கவும்.

கறிவேப்பிலையை அலசி உருவிக் கொள்ளவும்.

மசித்த உருளைக்கிழங்குடன் கரம் மசாலாப் பொடி, நறுக்கிய இஞ்சி, தேவையான உப்பு சேர்த்து கலந்து கொள்ளவும்.

வாணலியில் நல்ல எண்ணெய் ஊற்றவும். எண்ணெய் காய்ந்ததும் பெரிய வெங்காயம், பச்சை மிளகாய், கறிவேப்பிலை சேர்த்து தாளித்து வதக்கவும்.

வெங்காயம் நன்கு வதங்கிய பின்பு மசித்த உருளைக்கிழங்கு கலவையை சேர்த்து ஒரு சேரக் கிளறி இறக்கவும்.

உருளைக்கிழங்கு கலவை ஆறிய பின்பு அதனை சிறுசிறு உருண்டைகளாக உருட்டவும்.

வாணலியில் பொரிக்கும் எண்ணெயினை காய வைக்கவும்.

எண்ணெய் காய்ந்ததும் உருளைக்கிழங்கு உருண்டையை அரிசி மாவுக் கலவையில் முக்கி எண்ணெயில் போடவும்.

போண்டா ஒருபுறம் வெந்ததும் மறுபுறம் பிரட்டி வேக வைத்து எடுக்கவும்.

சுவையான உருளைக்கிழங்கு போண்டா தயார். இதனை தேங்காய் சட்டினியுடன் சேர்த்து உண்ணலாம்.

விருப்பமுள்ளவர்கள் உருளைக்கிழங்கு கலவையில் மஞ்சள் பொடி மற்றும் நறுக்கிய கொத்தமல்லி இலையைச் சேர்த்து கலவை தயார் செய்யலாம்.

–ஜான்சிராணி வேலாயுதம்