ஒரு வருடத்திற்கு மாங்காய் ஊறுகாய் செய்வது எப்படி?

ஒரு வருடத்திற்கு மாங்காய் ஊறுகாய் செய்வது எப்படி என்ற இந்த பதிவில், நீண்ட நாட்கள் கெட்டுப் போகாமல் இருக்கும் மாங்காய் ஊறுகாய் செய்யும் முறை பற்றிப் பார்ப்போம்.

மாங்காய் என்பது சீசனில் மட்டுமே கிடைக்கக் கூடிய உணவுப் பொருளாகும்.

சீசன் உணவுப் பொருளான மாங்காயை, இப்பதிவில் கூறிய முறைப்படி ஊறுகாய் தயார் செய்து, அதனை பக்குவமாகப் பயன்படுத்தினால், நீண்ட நாட்கள் ஊறுகாய் கெடாமல் இருக்கும்.

தேவையான பொருட்கள்

மாங்காய் – 1 கிலோ கிராம்

கல் உப்பு – 100 கிராம்

மண்டை வெல்லம் – 150 கிராம்

மிளகாய் வற்றல் பொடி – 100 கிராம்

கடுகு பொடி – 50 கிராம்

வெந்தய பொடி – 50 கிராம்

கட்டிப் பெருங்காயம் – 5 கிராம்

தாளிக்க

நல்ல எண்ணெய் – 100 கிராம்

கடுகு – 3 ஸ்பூன்

கறிவேப்பிலை – ஒரு கொத்து

செய்முறை

மாங்காயை கழுவி நன்கு துடைத்து விட்டு, பெரிய துண்டுகளாக வெட்டவும்.

 

 

 

 

நறுக்கிய மாங்காய் துண்டுகளுடன் கல் உப்பு சேர்த்து 24 மணி நேரம் ஊற வைக்கவும்.

உப்பு மாங்காயுடன் சேர்ந்து கரைந்து தண்ணீர் விடும்.

 

 

 

மாங்காயில் உள்ள தண்ணீரை வடித்துவிட்டு, மாங்காய் துண்டுகளை தனியே எடுத்து, வெயிலில் சுருள காய வைக்க வேண்டும்.

 

 

 

காய்ந்த மாங்காய் துண்டுகளை சிறுசிறு துண்டுகளாக நறுக்கிக் கொள்ளவும்.

 

 

கடுகு, வெந்தயத்தை எண்ணெய் விடாமல் தனித்தனியாக வறுத்து எடுத்து பொடியாக்கிக் கொள்ளவும்.

 

 

 

 

 

கட்டிப் பெருங்காயத்தை வெயிலில் காய வைத்து, சுத்தியால் நொறுக்கி மிக்ஸியில் பொடித்துக் கொள்ளவும்.

 

 

மண்டை வெல்லத்தை நன்கு பொடித்துக் கொள்ளவும்.

 

 

மிளகாய் வற்றலை வெயிலில் காய வைத்து, காம்பு நீக்கி பொடித்துக் கொள்ளவும்.

 

 

 

கறிவேப்பிலையை அலசி உருவி காய விடவும்.

 

 

வடித்து எடுத்த மாங்காய் உப்புத் தண்ணீரில், பொடித்த மண்டை வெல்லத்தை சேர்த்து ஒருசேரக் கரைந்ததும், வடிகட்டியில் வடித்துக் கொள்ளவும்.

 

 

வடித்த தண்ணீரை அடுப்பில் வைத்து ஒருகொதி வந்ததும் இறக்கவும்.

அதனுடன் மிளகாய் வற்றல் பொடி, கடுகு பொடி, வெந்தயபொடி, பெருங்காயப்பொடி, பொடியாக நறுக்கிய மாங்காய் துண்டுகள் சேர்த்து ஒருசேரக் கிளறவும்.

 

 

 

வாணலியை அடுப்பில் வைத்து நல்ல எண்ணெய் ஊற்றி காய்ந்ததும், அதனுடன் கடுகு, கறிவேப்பிலை சேர்த்து தாளித்து ஊறுகாயில் கொட்டி, ஒருசேரக் கிளறவும்.

 

 

 

கலவை உள்ள பாத்திரத்தின் வாயினை துணியால் கட்டி வெயிலில் 3 முதல் 4 நாட்கள் பகல் முழுவதும் வைத்து எடுக்கவும்.

 

 

 

சுவையான ஒரு வருடத்திற்கு மாங்காய் ஊறுகாய் தயார்.

 

 

காய்ந்த கண்ணாடி பாட்டிலில் ஊறுகாயை முக்கால் பாகம் நிரப்பி, காற்றுப் புகாதவாறு மூடி வைக்கவும். தேவைப்படும் சமயத்தில் சின்ன பாட்டிலில் எடுத்து உபயோகிக்கவும்.

குறிப்பு

நல்ல புளிப்பான மாங்காய்களை ஊறுகாய்க்குத் தேர்வு செய்யவும்.

ஜான்சிராணி வேலாயுதம்