காட்டுக்குள் தீபாவளி

நாட்டுக்குள்ள தீபாவளி நாளு வருதாம் – அதில்

நம்மளோட பேரெல்லாம் சேர்ந்து வருதாம்

வேட்டைக்கார நரிவந்து சொல்லி போச்சுதென – அந்த

வேங்கை மகன் வரிப்புலி சொல்லி சிரிச்சான்

குட்டியானை உன்பேரால் ஒருவெடியாம் -அது

குண்டாக தும்பிக்கையோட இருக்காம்

எட்டியந்த கையில் தீயை பத்த வச்சாக்க –அது

எட்டு ஊரு கேக்கும்படி சத்தம் போடுமாம்

கொத்தும் பாம்பே உன்பேரால் ஒருவெடியாம் -அது

கோபத்தோட உன்போல சீறிஎழுமாம்

கட்டை குரல் தவளையே உனக்கொன்றாம் -அது

கச்சிதமாய் தாவித்தாவி செல்லும் வெடியாம்

கூட்டுடனே வாழுகின்ற நத்தை மாமாவே – உங்க

கூடுபோல வாலுடனே சக்கர வெடியாம்

சேட்டை செய்யும் குரங்கிவன் வாலைப்போலவே – அந்த

சாட்டை யெனும் வெடியும் செஞ்சிருக்குதாம்

புட்டுபுட்டு உள்ளதையே சொன்ன வேங்கையை – சில

போதும் போதும் நிறுத்துஎன கோபம் கொண்டன

காட்டெருமை கூட்டம்கூட கோபம் கொண்டது – அதை

கண்டவுடன் மான்களெல்லாம் ஓட்டமிட்டது

காட்டுக்குள்ள வாழுகின்ற நம்ம பேரால –அங்க

கண்டபடி வெடிக்கிற வெடி எதுக்காம்

ரெட்டைவாலுக் குருவியும் மேலே சொன்னதாம் – அதை

ரெண்டுல ஒன்னு பார்த்திடத்தான் வேண்டுமென்றதாம்

விட்டுடுங்க அதையெல்லாம் மறந்திடுங்க –என

வெள்ளைமுயல் அப்போது பேசலானது

குட்டிசெல்லம் வெல்லக்கட்டி போல பிள்ளைங்க –நம்ம

பேரைக் கொண்ட வெடிகளை விரும்புறாங்க

மொட்டுபோல சிரிக்கும் சுட்டிப்பிள்ளைங்க – மனம்

முழுதாய் மலர்வதும் நம்ம பேராலே

நட்டநடு காட்டில் வாழும் நம்மினத்திற்கே –அது

நன்மையென்று தீமையதில் இல்லை உண்மையே

குட்டிமுயல் சொல்லக்குட்டி எல்லாம் மகிழ – அவை

கொண்டாட நினைத்தன தீபாவளியை

கூட்டிவாங்க குழந்தைகள் கூட்டத்தினையே –சேர்ந்து

கொண்டாட வேண்டும் இந்த தீபாவளியை

பாட்டுப்பாடி ஆட்டத்தோட காடே அதிர –நரி

பற்றவைத்த சரமொன்று வெடிவெடிக்க

ஓட்டுடனே அங்கு வந்த ஆமை பதற

ஓவென்ற சத்தத்தோட நாமும் சிரிப்போம்.