என்ன செய்யலாம் தோழனே – இது
தேர்வு முடிந்த காலமே!
புன்னகை தன்னை முகத்தில் தேக்கியே
புவியினில் வலம் வரத்தோணுதே!
தண்ணீர் நிறைந்த கேணிகள் – தேடி
தாவிக் குதித்து நீந்தவா?
உண்ணும் உணவினை உலக்கு அளிக்கும்
உழவுத் தொழிலை அறியவா?
மண்ணு உலகுதனில் மக்களின் – மானம்
காத்திடும் நெசவினைக் கற்கவா!
திண்ணையில் தூங்கிக் கிடக்கும் சிலரை
திருந்திடச் செய்து காட்டவா!
கன்னித் தமிழில் கவிதைகள் – சில
காவியம் படித்து மகிழவா!
பண்ணோடு இசையினைப் பாடி மகிழ
பல்லவி தன்னைத் தேடவா!
என்னநாம் செய்த போதிலும் – அதில்
ஏற்ற நன்மையைத் தேடணும்!
விண்குடை கீழே வாழ்ந்திடும்
விரிகடல் நலம் பெற வேணுமே!
மறுமொழி இடவும்