அரசியல் என்பது பூக்காடு – பல
அற்புதம் நிகழ்த்தும் தேன்கூடு
உரசிப் பார்த்திட கண்கூடு – அது
உள்ளுறை இல்லா வெறும் கூடு
சிரிப்பாய் பேசியே மயக்கும் – சிறு
செவ்வந்தி போல்சில மலருண்டு
விரிந்தே கிடந்து எடுக்கும் – போது
விரைந்தே தாக்கும் சிலவுண்டு
உதிர்ந்தே போயினும் பலரின் – மன
உணர்வில் வாழும் சிலவுண்டு
மதிபோல் குளிரும் ஆதவன் – தனது
மனம்போல் வெம்மையும் இங்குண்டு
சதிதான் இதுவென தோற்றவர் – பலர்
செப்பிடும் மொழியும் கேட்பதுண்டு
விதிதான் இதுவென அதிர்வாய் – இங்கு
வென்றவர் கூற்றும் வருவதுண்டு
எதுவாய் இருப்பினும் பயமில்லை – இனி
எப்படி இருப்பினும் கவலையில்லை
மதுவென பாய்ந்து மக்கள் – தமது
மனங்களை கெடுப்பினும் தவறில்லை
இதமாய் ஒருநாள் ஓட்டுக்காய் – இங்கு
எம்மிடம் தேடியே வருவதனால்
சுதந்திரம் இங்கே இருப்பதனால் – அதை
சுகமென நாமும் சுமந்திடலாம்
– இராசபாளையம் முருகேசன்
கைபேசி: 9865802942