பாசிப்பருப்பு எள்ளுக் கொழுக்கட்டை செய்வது எப்படி?

விநாயகர் சதுர்த்திக்கு படைக்கும் கொழுக்கட்டை வகைகளுள் ஒன்று பாசிப்பருப்பு எள்ளுக் கொழுக்கட்டை ஆகும்.

இதனை எளிய முறையில் தயார் செய்ய முடியும். சுவையான இக்கொழுக்கட்டை செய்முறை பற்றி பார்ப்போம்.

தேவையான பொருட்கள்

பச்சரிசி – 200 கிராம்

புழுங்கல் அரிசி – 200 கிராம்

சீனி – 150 கிராம்

பாசிப்பருப்பு – 100 கிராம்

எள்ளு – 25 கிராம்

தேங்காய் – 1 எண்ணம்

 

செய்முறை

முதலில் பச்சரிசி, புழுங்கல் அரிசி இரண்டையும் ஒரு மணி நேரம் ஊறவைக்கவும். பின் தண்ணீரை வடித்துவிட்டு ஒரு உலர்ந்த துணியில் போடவும். 10 நிமிடங்கள் கழித்து எடுத்து மிசினில் கொடுத்து இடித்துக் கொள்ளவும்.

பின் அடிகனமான பாத்திரத்தில் மாவைப் போட்டு அடுப்பில் வைத்து வறுத்தெடுக்கவும். வறுத்தெடுக்கும்போது மாவானது ஈரப்பதம் நீங்கி உலர்ந்தவுடன் பாத்திரத்தில் கொட்டி ஆறவிடவும்.

பின் வறுத்த மாவினை சல்லடையில் போட்டு சலிக்கவும். கப்பியை மிக்ஸியில் போட்டு மீண்டும் சலிக்கவும். இப்போது கொழுக்கட்டை தயாரிக்க மாவு தயார்.

தேவையான பொருட்கள்
பாசிப்பருப்பு எள்ளுக் கொழுக்கட்டை – தேவையான பொருட்கள்

 

இதனை சதுர்த்திக்கு இரண்டு அல்லது மூன்று நாட்களுக்கு முன்னதாகவே தயார் செய்து வைத்துக் கொள்ளலாம்.

தேங்காயை உடைத்து துருவிக் கொள்ளவும். பின் வாணலியில் தேங்காயை வறுத்துக் கொள்ளவும்.

பாசிப்பருப்பு, எள்ளு ஆகியவற்றையும் தனித்தனியே வறுத்துக் கொள்ளவும்.

பின் ஒரு பாத்திரத்தில் வறுத்து வைத்துள்ள கொழுக்கட்டை மாவு, பாசிப்பருப்பு, எள்ளு, தேங்காய், சீனி ஆகியவற்றைப் போட்டு ஒருசேரக் கலக்கவும்.

மாவுடன் பாசிப்பருப்பு எள்ளு கலந்த பின்
மாவுடன் பாசிப்பருப்பு எள்ளு கலந்த பின்

 

தேவையான அளவு தண்ணீரை நன்கு கொதிக்க வைத்துக் கொள்ளவும்.

பின் அதில் கொதிக்க வைத்துள்ள தண்ணீரை சிறிது சிறிதாகச் சேர்த்துப் பிசையவும்.

சரியான பதத்தில் கொழுக்கட்டை மாவு
சரியான பதத்தில் கொழுக்கட்டை மாவு

 

கொழுக்கட்டை மாவினை சப்பாத்தி மாவு போல் திரட்டிக் கொள்ளவும்.

திரட்டிய கொழுக்கட்டை மாவு
திரட்டிய கொழுக்கட்டை மாவு

 

பின் அதிலிருந்து சிறிய எலுமிச்சை அளவு எடுத்து நீளவாக்கில் படத்தில் காட்டியவாறு கொழுக்கட்டைகளாகப் பிடித்துக் கொள்ளவும். இவ்வாறாக எல்லா மாவினையும் கொழுக்கட்டைகளாக செய்து கொள்ளவும்.

பிடித்து வைத்த கொழுக்கட்டை
பிடித்து வைத்த கொழுக்கட்டை

 

பின் கொழுக்கட்டைகளை இட்டிப் பானையில் வைத்து ஆவியில் வேக வைத்து எடுக்கவும்.

வேகவைக்கத் தயார் நிலையில் கொழுக்கட்டை
வேகவைக்கத் தயார் நிலையில் கொழுக்கட்டை

 

சுவையான பாசிப்பருப்பு எள்ளுக் கொழுக்கட்டை தயார்.

சுவையான பாசிப்பருப்பு எள்ளுக் கொழுக்கட்டை
சுவையான பாசிப்பருப்பு எள்ளுக் கொழுக்கட்டை

 

இது பார்ப்பதற்கு வண்ணமயமாக இருக்கும். சிறியவர்கள் இக்கொழுக்கட்டையை விரும்பி உண்பர். நீங்களும் விநாயக சதுர்த்திக்கு உங்கள் வீட்டில் செய்து விநாயகருக்கு படையலிட்டு வழிபாடு மேற்கொள்ளுங்கள்.

 

குறிப்பு

இதில் சேர்க்கப்படும் பொருட்கள் எல்லாவற்றையும் வறுத்துவிடுவதால் இக்கொழுக்கட்டை மணமாகவும், சுவைமிகுந்தும் இருக்கும்.

விருப்பமுள்ளவர்கள் சிறிதளவு ஏலக்காய்த் தூளை கொழுக்கட்டை மாவினைத் திரட்டும் போது சேர்த்து கொழுக்கட்டை தயார் செய்யலாம்.

ஜான்சிராணி வேலாயுதம்

 

தங்கள் கருத்துக்களைப் பகிரலாமே!

This site uses Akismet to reduce spam. Learn how your comment data is processed.