மாலை நேரம் வந்துச்சுன்னா மனசு உருகுதே – ஒரு
மயக்கத்தை தான் எந்தன் நெஞ்சில் அதுவும் கொடுக்குதே
சேலை கட்டி வளர்ந்த பிறகும் சுகத்தை கொடுக்குதே – நாம
சேர்ந்து விளையாடியதை நினைக்கும் போதிலே (மாலை)
சோளத்தட்டை தேரு செஞ்சி ஓட்டி ரசிச்சோம் – பிறகு
சோறு பொங்கி குழம்பு வச்சி பார்த்து ரசிப்போம்
ஆளுக்காளு வீடுகட்டி மணலை சிதைப்போம் – அதை
அடிச்சி நொறுக்கி மறுபடியும் கட்டி ரசிப்போம் (மாலை)
சும்மா கிடந்த கல்லை எடுத்து சாமியாக்கினோம் – அதை
சுமந்துகிட்டு ஊர்வலமாய் நடந்து காட்டினோம்
அம்மா தந்த அரிசி முருக்கை அதுக்கு படைச்சோம் – அதை
அழகுப் பூவால் அலங்கரிச்சு அழிச்சி சிரிச்சோம் (மாலை)
கள்ளன் போல நீ ஒளிய நானும் தேடுவேன் – உன்னை
கண்டுகிட்டா கைபிடிச்சி இழுத்து ஓடுவேன்
கள்ளமில்லா அந்த வயசும் திரும்ப கிடைக்குமா? – நான்
கைபிடிச்சி இழுத்திடத்தான் இப்ப முடியுமா? (மாலை)
– இராசபாளையம் முருகேசன் (கைபேசி: 9865802942)