அன்னாசிப் பழம் – மருத்துவ குணங்கள்

ஆங்கிலத்தில் ‘பைன் ஆப்பிள்’ என்று சொல்லப்படுகிற அன்னாசிப் பழம் எல்லோரும் நன்கு அறிந்ததுதான். மூக்கைத் துளைக்கும் நறுமணம் மிக்க அன்னாசிப் பழம் எளிதில் கிடைக்கக்கூடிய ஓர் பழம்.

ஆனால், எவ்வளவுபேர் இப்பழத்தை விரும்பி அடிக்கடி சாப்பிடுகிறோம்? எப்போதாவதுதான் சாப்பிடுகிறோம்.

இன்றைய நாளில் இப்பழத்தை எளிதாக சாப்பிடும் அளவுக்கு வியாபாரிகள் சிறுசிறு துண்டுகளாக அழகாக நறுக்கி, கெட்டியான அட்டை கப்புகளில் (Disposable Cups) நிரப்பி, ஸ்பூனுடன் தருகிறார்கள்.

கை படாமல் எடுத்துச் சாப்பிடும் விதமாக‌, ஒவ்வொரு நகரத்திலும் தள்ளு வண்டிகளில் வைத்து இதனை விற்பனை செய்வதைப் பார்க்கிறோம்.

அன்னாசிப் பழம் உடலுக்கு சூடு என்னும் நினைப்பில், இப்பழத்தில் அடங்கியுள்ள மருத்துவ குணங்களைப் பற்றி அறியாதவர்கள், இப்பழத்திற்கு அவ்வளவு முக்கியத்துவம் தருவதில்லை.

எலும்புகளின் நண்பன்

மூட்டுகளை அசைக்கும்போதும், உட்கார்ந்து எழும்போதும் ஏற்படும் மூட்டுவலி இரும்புச்சத்து குறைவால்தான் ஏற்படுகிறது.

அன்னாசிப்பழம் எலும்புகளை வலுப்படுத்தும் குணமுடையது. எலும்புகளையும், அதன் திசுக்களையும் வலுப்படுத்த மாங்கனீஸ் (Manganese) சத்து நம் உடலுக்கு தேவை.

ஒரு கப் அன்னாசிப்பழ ஜூஸ் அல்லது நறுக்கிய துண்டுகளில் அன்றாடத் தேவையான 73 சதவிகித மாங்கனீஸ் சத்து கிடைக்கிறது.

இளைஞர்களின் எலும்பு வளர்ச்சிக்கும், முதியவர்களின் எலும்பு வலுவிற்கும் இந்த மாங்கனீஸ் சத்து உதவுகிறது.

ஆர்த்ரைட்டீஸ்‘ எனச் சொல்லப்படும் மூட்டுவலிக்கு அன்னாசிப்பழம் அருமருந்து. மூட்டுவலி இல்லாதவர்களுக்கு அதிகப்படியான இரும்புச் சத்தை அளிப்பதன் மூலம் எலும்புகளைப் பலப்படுத்துவதில் அன்னாசிப்பழத்தின் பங்கு மகத்தானது.

எலும்புகளை மட்டுமின்றி அன்னாசிப்பழம் பல் ஈறுகளையும் வலுப்படுத்தி பற்களை ஆரோக்கியமாக வைத்துக் கொள்ளவும் உதவுகிறது.

ஈறுகளில் தோன்றும் வியாதிகளுக்கு காரணமான பாக்டீரியாக்களை அழித்து ஈறுகளை ஆரோக்கியமாக வைத்துக் கொள்ள இப்பழத்திலுள்ள வைட்டமின் ‘சி’ பெரிதும் துணைபுரிகிறது.

இதர பயன்கள்

ஜலதோசம், இருமலால் அவதியா? உணவில் அன்னாசிப்பழம் சேர்த்துக் கொண்டாலே போதுமானது. சைனஸ் மற்றும் தொண்டையில் தொந்தரவா? சளித்தொல்லையா? அனைத்தையும் இப்பழம் போக்கும்.

இப்பழத்தை ஐரோப்பிய நாடுகளில் பொதுவாக தொண்டை அறுவை சிகிச்சைக்கு முன்பு சாப்பிடச் சொல்கிறார்கள். அதனால் சைனஸ் தொல்லை குறைகிறதாம்.

ஆரஞ்சு ஜூஸில் அடங்கியுள்ள வைட்டமின் ‘சி’ அன்னாச்சிப் பழத்திலும் கிடைப்பதால் ஜலதோசம், இருமலுக்கு இப்பழம் உகந்தது.

அன்னாசிப்பழத்தில் உள்ள கந்தகச் சத்தில் ‘புரொட்டியோலிட்டிக்’ (Proteolytic Enzyme) என்னும் என்சைம் இருப்பதால் இப்பழம் ஜீரண சக்தியை அதிகரிப்பது மட்டுமின்றி, உணவில் உள்ள புரதத்தை நன்கு ஜீரணமடையச் செய்கிறது. மேலும் இது வீக்கத்தை கட்டுப்படுத்தும் இயற்கை நிவாரணியும்கூட.

அன்னாசிப்பழத்தை உணவுடன் சேர்த்து சாப்பிடுவது சாலச் சிறந்தது.

இதயத்திலிருந்து ரத்தம் எடுத்துச் செல்லும் குழாய்களில் அடைப்பு ஏற்படாமல் ரத்த ஓட்டம் ஒரே சீராக இருக்க இப்பழத்திலுள்ள என்சைம் உதவுகிறது.

ரத்தம் உறைதலைத் தடுப்பதிலும், இக்குழாய்களில் ப்ளேக் நோய் பீடிக்காமல் தடுப்பதிலும் அன்னாசிப்பழம் உதவுகிறது.

தெளிவான கண் பார்வைக்கும், மிருதுவான சருமத்திற்கும் அன்னாசிப்பழம் மிகச் சிறந்தது.

இதிலுள்ள இயற்கையான பழச்சத்து மிகுந்த என்சைமும், அமிலமும் சருமத்தை பளபளப்பாக வைத்துக் கொள்ள உதவுகின்றன.

அன்னாசிப்பழம், ஆரஞ்சு, எலுமிச்சை ஜூஸ் கலவையுடன் கோதுமை மாவை சிறிது கலந்து பசைபோல் தயாரித்து முகத்திலும், கழுத்திலும் தொடர்ந்து தடவிவர, முகத்தில் புத்துணர்ச்சியைப் பெறலாம்.

அன்னாசிப்பழத்தின் மகத்துவத்தை அறிந்து அடிக்கடி அதை உட்கொண்டு நம் ஆரோக்கியத்தைப் பேணிக் காப்போம்.

ஜானகி எஸ்.ராஜ்
திருச்சி
கைபேசி: 9442254998

மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன

This site uses Akismet to reduce spam. Learn how your comment data is processed.