நம்மில் பெரும்பாலானவர்களுக்கு, மற்றவர்களைப் பார்த்து அவர் உயர்ந்தவர், பணக்காரர், திறமைசாலி, அறிவாளி என்று எடைபோடும் பொழுதெல்லாம், நம் மனதில் மறைமுகமாக ‘நாம் அவர்களை விடத் தாழ்ந்தவர்’ என்ற உணர்வும் பதிவாகி விடுவது வேதனையான விஷயம்.
இதற்கு காரணம் நாம் பிறரை எடைபோட்டு புரிந்து கொள்ள மெனக்கெடுகின்ற அளவு, நம்மைப் பற்றி புரிந்து கொள்ள முயற்சி மேற்கொள்வதே இல்லை. அதாவது தன்னையறிதல் இல்லை.
இதனால் நம்மிடம் இருக்கும் ஆற்றல், திறமை, தைரியம், அன்பு மற்றும் பண்பு இவை யாவும் நமக்குத் தெரியாமலும், நமக்குப் பயன்படாமலும் போய்விடுகின்றன.
வான் குருவியின் கூடு
கவிச்சக்கரவர்த்தி கம்பரும் அவ்வையாரும் சமகாலத்தில் வாழ்ந்த இரு பெரும் புலவர்கள். கம்பர் அரசவைக் கவிஞர். ஆனால் அவ்வையாரோ ஒரு பாமரக் கவிஞர்.
ஒரு நாள் ஒரு இளைஞன் அவ்வையாரைப் பார்த்து வேடிக்கையாக ஒரு கேள்வி கேட்டான்.
“ஏய் கிழவி, கவிச்சக்கரவர்த்தி கம்பரும் உன் போன்ற ஒரு புலவர் தானே? அவர் அரசவையில் கவிஞராக இருக்கின்றார். மேலும் அவர் பொற்காசுகளுக்குக் கவிதை எழுதுகிறார்.
ஆனால் நீயோ இங்கே யாராவது கொடுக்கின்ற கூழுக்கும் கஞ்சிக்கும் பாட்டு எழுதிக் கொடுத்துக்கொண்டு இருக்கின்றாய். அது ஏன்?” என்பதுதான் அக்கேள்வி.
அவனுக்கு பதிலாக அவ்வையார் அழகான பாடல் ஒன்றைப் படித்தார். அது என்னவென்றால்,
“வான் குருவியின் கூடு வல்லரசுக்குத் தொல்கரையான்
தேன் சிலம்பி யாவர்க்கும் செய்யரித்தால் – யாம் பெரிதும்
வல்லோமே என வார்த்தை சொலவேண்டாம் காண்
எல்லார்க்கும் ஒவ்வொன்று எளிது”
அதாவது தூக்கணாங்குருவி தனது அலகாலே இவ்வளவு அழகானக் கூடு கட்டுகிறது. அது உன்னால் முடியுமா?
கரையான் சின்ன உருவத்தோடு இருந்தாலும், அதனைவிட பன்மடங்கு உயரமான, சுற்றுப்புற தட்ப வெட்ப நிலையினை இதமாக தாங்குகின்ற புற்றினைக் கட்டுகிறது. அது உன்னால் முடியுமா?
ஆயிரம் அறைகளோடு தேனீ அமைக்கிற கூடு மாதிரி, எச்சிலாலே சிலந்தி அமைக்கின்ற வலை மாதிரி, உன்னாலும் என்னாலும் இல்லை வேறு யாராலேயும் வீடு அமைக்க முடியுமா?
எனவே நான்தான் பெரியவன்; நான்தான் வல்லவன் என்று கர்வமுற்று செருக்கோடு சொல்லாதே. எல்லோருக்கும் ஏதோ ஒரு விஷயம் எளிமையாக, இலகுவாகத்தான் இருக்கும்.
அந்தத் திறமையைக் கண்டறிந்து வெளிக்கொணர்ந்து செயற்கரிய சாதனைகள் பல புரியலாம்.
பாமர மக்களிடம் பழகி, அவர்களின் வாழ்க்கை முன்னேற அறிவுரை கூறுவதுதான் தனது விருப்பமும் பலமும் என்று மறைமுகமாக அவர் கூறுகிறார். எல்லோருக்குமான கருத்துக்களை எளிய வடிவில் கூறியதில் அவ்வையாரே முதன்மையானவர்.
இதை அறிந்து தான் கவியரசர் கண்ணதாசனும் தம் பாடல் வரிகளில்
உன்னையறிந்தால் நீ உன்னையறிந்தால்
உலகத்தில் போராடலாம்! உயர்ந்தாலும்
தாழ்ந்தாலும் தலை வணங்காமல் நீவாழலாம்!
என பாடி வைத்தார்.
தன்னையறிதல் வெற்றியின் முதல்படி. தன்னை அறிந்த பின்பு எடுக்கும் எந்த முயற்சியும் வெற்றிக்கு வழிவகுக்கும்.
அறியாத மான்
கஸ்தூரி மான் பற்றி ஒரு செய்தி சொல்வார்கள்.
அபரிமிதமான வாசனையைத் திடீர் என்று ஒரு நாள் அது உணரும்.
எங்கிருந்து வருகின்றது இந்த வாசனை என்று தெரியாமல், அதனைத் தேடித் தேடி வெறிபிடித்த மாதிரி ஓடி ஓடிக் களைத்து நிற்க முடியாமல் கீழே விழும்.
முடிவில் சாகும் தருவாயில் அந்த வாசனைத் திரவியம் தன் உடலில் இருந்து சுரக்கும் “மஸ்கோன்” எனப்படும் வேதிப்பொருள்தான் எனக் கண்டறியும்.
இந்தக் கஸ்தூரி மான் போல ஒவ்வொருவரிடமும் ஒவ்வொரு திறமை புதைந்து கிடக்கின்றது.
இந்த மான் போல அதனை வெளியில் தேடாமல், நம்முள் தேடி, தன்னை அறிந்து, தளர்வின்றி முயற்சி மேற்கொண்டால் செயற்கரிய சாதனை என்பது நம் அனைவருக்கும் சாத்தியமே.
“செயற்கரிய செய்வார் தன்னையறிந்த பெரியோர்”
முனைவர் பொ.சாமி
வேதியியல் இணைப் பேராசிரியர்
வி.இ.நா. செந்திக்குமார நாடார் கல்லூரி
விருதுநகர்-626 001
கைபேசி: 9443613294
தங்கள் கருத்துக்களைப் பகிரலாமே!