உலகின் பசுமை நாடுகள் 2020

உலகின் பசுமை நாடுகள் 2020 பட்டியலை யேல் மற்றும் கொலம்பியா பல்கலைக்கழங்கள் இணைந்து ஆய்வு நடத்தி சமீபத்தில் வெளியிட்டுள்ளன.

இந்த ஆய்விற்கு 180 நாடுகளின் சுற்றுசூழல் மற்றும் அதனுடைய செயல்திறன் கணக்கில் கொள்ளப்பட்டன.

இப்பட்டியலில் முதல் பத்து இடங்களை ஐரோப்பிய நாடுகள் பிடித்துள்ளன. இப்பட்டியலில் இந்தியா 169-வது இடத்தையும், ஐக்கிய அமெரிக்கா 24-வது இடத்தையும், சீனா 120-வது இடத்தையும், பாகிஸ்தான் 142-வது இடத்தையும் பிடித்துள்ளன.

ஒருநாட்டு மக்களுடைய ஆரோக்கியத்தில் அதனுடைய சுற்றுசூழல் முக்கிய பங்கு வகிக்கிறது. நிலம், நீர், காற்று உள்ளிட்டவைகள் மாசடையாது இருந்தால் சுற்றுசூழல் சிறப்பாக இருக்கும்.

எதிர்கால சந்ததியினருக்கு வளமான சுற்றுசூழலை பரிசளிப்பது நிகழ்கால மக்களின் முக்கிய கடமை ஆகும். இதனைக் கருத்தில் கொண்டே ஒவ்வொருவரும் செயல்பட வேண்டிய கட்டாயத்தில் இருக்கிறோம்.

உலகின் பசுமை நாடுகள் பட்டியலானது சுற்றுசூழல் செயல்திறன் குறியீடு (Environmental Performance Index) கொண்டே தரவரிசைப் படுத்தப்பட்டு உள்ளன.

இச்செயல்திறன் குறியீடு சுற்றுசூழல் ஆரோக்கியம் மற்றும் சுற்றுசூழல் அமைப்பு (Eco System) ஆகியவற்றை உள்ளடக்கிய 11 பிரிவுகளில் 32 செயல்திறன் குறிகாட்டிகளை 100 மதிப்பெண்களுக்கு மதிப்பீடு செய்து தரவரிசைப் படுத்தியுள்ளது.

இரு ஆண்டுகளுக்கு ஒருமுறை இவ்வறிக்கை தயார் செய்யப்படுகிறது.

இப்பட்டியல் தயார் செய்யப் பயன்படுத்திய பிரிவுகளாவன

1.காலநிலை மாற்றம்

2.காற்றின் தரம்

3.குடிநீர் மற்றும் சுகாதாரம்

4.பல்லுயிர் மற்றும் வாழிடம்

5.சுற்றுசூழல் அமைப்பு சேவைகள்

6.மீன்வளம்

7.நீர்வள ஆதாரம்

8.மாசு உமிழ்வு

9.வேளாண்மை

10.கனஉலோகங்கள்

11.கழிவு மேலாண்மை ஆகியவை ஆகும்.